HTML tutorial

வடமாகாணம் – வவுனியா மாவட்டம் – வவுனியா, வைரவப் புளியங்குளம் அருள்மிகு ஆதிவிநாயகர் திருக்கோயில்

எட்டுத்திக்கும் அருள்பரப்பி ஏற்றிடைய்யா கருணை ஒளி
மட்டில்லா பேருவகை வழங்குகின்ற தலைமகனே
ஓட்டிவிடு தீமைகளை ஒளிரச் செய்வாய் நன்மைகளை
வைரவப் புளியங்குளம் அமர்ந்த ஆதிவிநாயகப் பெருமானே

குளம் சூழ்ந்த பெருநிலத்தின் மத்தியிலே குடி கொண்டாய்
அலைமோதும் மனங்களுக்கு அமைதியையே தருவோனே
நிலை குலையா நிம்மதிக்கு உன்னருளே வேண்டுமைய்யா
தலைநிமிர்ந்து வாழ வைப்பாய் ஆதிவிநாயகப் பெருமானே

எழில் சூழ்ந்த தமிழ் மண்ணின் மத்தியிலே அமர்ந்தவனே
வழித்துணையாயிருந் தெமக்கு நேர்வழியைக் காட்டிடைய்யா
இழி நிலையைப் போக்கிவிடு இன்பநிலை தந்துவிடு
விழிமலர்ந்து காப்பவனே ஆதிவிநாயகப் பெருமானே

சலித்து நிற்போர் மனங்களிலே நம்பிக்கை தருவோனே
கிலிகொண்டு துவண்டு நிற்போர் துயர் களைந்து அருள்வோனே
வலிந்து வரும் துன்பங்களைப் போக்கி அருள் செய்திடுவாய்
நலிவில்லா நலமளிக்கும் ஆதிவிநாயகப் பெருமானே

நன்மைகள் பெருகிடவும் நானிலத்தோர் மகிழ்ந்திடவும்
உண்மையெங்கும் ஓங்கிடவும் ஊரெல்லாம் செழித்திடவும்
மென்மையுள்ளம் கொண்டவனே அடிபணிந்தோம் உந்தனையே
அன்பைப் பெருக்கியெம்மை ஆட்கொள்வாய் ஆதிவிநாயகப் பெருமானே

வீதிவலம் வந்து நலம் அருளுகின்ற விநாயகரே
நாதியில்லை என்ற நிலை எமக்கென்றும் இல்லையைய்யா
ஆதிசிவன் பெற்ற மகன் அருகினிலே நீயிருக்க
கதிநீயே கருணை செய்து அரவணைப்பாய் ஆதிவிநாயகப் பெருமானே.

ஆக்கம்- த.மனோகரன்.
துணைத் தலைவர்,
அகில இலங்கை இந்து மாமன்றம்.