ஆட்பதிவுத் திணைக்களத்தின் மத்திய மாகாண அலுவலகம் இன்று (22) நுவரெலியாவில் திறக்கப்படவுள்ளதாக, ஆணையாளர் ஜீ. பிரதீப் சப்புத்தந்திரி தெரிவித்தார்.
இதுவரை காலமும் ஆட்பதிவுத் திணைக்களத்தின் மத்திய மாகாண அலுவலகம் கண்டியில் சிறிய அலுவலகமாக இயங்கி வந்தது. இவ்வலுவலகம் நுவரெலியா நகரில் இலக்கம் 95/26ஏ, லேடி மெகலம் வீதி, ஹாலியெல என்ற புதிய முகவரிக்கு இடமாற்றப்படவுள்ளது.
இங்கு சாதாரண சேவையூடாக தேசிய அடையாள அட்டைகளைப் பெறுவதற்கான வசதிகள் செய்யப்பட்டுள்ளன. அத்துடன் விரைவில் ஒரு நாள் சேவையும் ஆரம்பிக்கப்படுமென்றும் அவர் குறிப்பிட்டார்.
மத்திய மாகாணத்தை உள்ளடக்கும் விதமாக நுவரெலியாவில் இந்த அலுவலகம் திறக்கப்படுகிறது. வடமாகாணத்திற்கு வவுனியாவிலும், கிழக்கு மாகாணத்தில் மட்டக்களப்பிலும், தென் மாகாணத்தில் காலியிலும் ஆட்பதிவுத் திணைக்களத்தின் மாகாண அலுவலகங்கள் ஏலவே திறக்கப்பட்டுள்ளன.
பிரதான அலுவலகம் தவிர்ந்த காலி ஆட்பதிவுத் திணைக்களத்தின் அலுவலகத்தில் மாத்திரமே சாதாரண சேவையுடன் ஒரு நாள் சேவையில் தேசிய அடையாள அட்டைகளை வழங்கப்படுவதாகவும், ஆட்பதிவுத் திணைக்களம் தெரிவித்தது.
