“எமது முன்னோர்கள் இயற்கை பொதியிடல் முறைகளையே பயன்படுத்தினர். ஆனால், கடந்த சில தசாப்தங்களாக பிளாஸ்டிக் பாவனைக்கு அடிமையானதால், யுத்தம் மற்றும் தொற்றா நோய்களை விட பாரிய மரண அச்சுறுத்தலை ஏற்படுத்தும் சுற்றுச்சூழல் மற்றும் சுகாதார நெருக்கடிக்கு நாம் முகம் கொடுத்துள்ளோம்” என அரச நிர்வாக, மாகாண சபைகள் மற்றும் உள்ளூராட்சி அமைச்சர் பேராசிரியர் சந்தன அபயரத்ன தெரிவித்தார்.
இலங்கையில் பாரிய பிரச்சினையாக உருவெடுத்துள்ள பொலித்தீன் மற்றும் பிளாஸ்டிக் கழிவுகளை முகாமைத்துவம் செய்வதற்காக, உள்ளூராட்சி மன்றங்கள் மற்றும் உற்பத்தியாளர்களை ஒன்றிணைக்கும் ‘நீட்டிக்கப்பட்ட உற்பத்தியாளர் பொறுப்பு’ (Extended Producer Responsibility – EPR) மற்றும் ‘மீளச் சேகரிக்கும்’ (Collect-back) மூலோபாய மாதிரி குறித்த விசேட விழிப்புணர்வு வேலைத்திட்டம் அண்மையில் கொழும்பு கோல் ஃபேஸ் ஹோட்டலில் நடைபெற்றது.
அமைச்சர் பேராசிரியர் சந்தன அபயரத்ன தலைமையில் நடைபெற்ற இந்த நிகழ்வில் அவர் வெளியிட்ட அதிரடித் தகவல்கள் வருமாறு:
அதிர்ச்சியூட்டும் புள்ளிவிபரங்கள்:
ஆண்டுதோறும் உருவாகும் கழிவு: 1.6 மில்லியன் மெட்ரிக் தொன்களுக்கும் அதிகமான பிளாஸ்டிக் கழிவுகள்.
தினசரி கழிவு: சுமார் 938 மெட்ரிக் தொன்கள்.
சேகரிக்கப்படும் அளவு: சூழலில் இருந்து வெறும் 32% மட்டுமே சேகரிக்கப்படுகிறது.
மீள்சுழற்சி: மொத்த கழிவுகளில் 4% மட்டுமே மீள்சுழற்சிக்கு உட்படுத்தப்படுகிறது.
இந்த மோசமான நிலைமையால், சர்வதேச தரவுகளின்படி கடல் பிளாஸ்டிக் மாசுபாட்டிற்கு அதிக பங்களிப்பு செய்யும் நாடுகளில் ஒன்றாக இலங்கை மாறியிருப்பது கவலையளிப்பதாக அமைச்சர் சுட்டிக்காட்டினார்.
வரலாறும் தர்மமும்:
அனுராதபுர காலத்தில் மன்னர் பண்டுகாபய கழிவு முகாமைத்துவத்திற்காக விசேட குழுக்களை நியமித்த வரலாற்றை நினைவுகூர்ந்த அமைச்சர், பௌத்த தர்மத்தின் ‘வனரோப சூத்திரம்’ மூலம் சூழல் பாதுகாப்பு என்பது இரவும் பகலும் புண்ணியம் சேர்க்கும் செயல் என வலியுறுத்தினார். “அன்றைய சமூகம் பனை ஓலை போன்ற இயற்கைப் பொருட்களைப் பயன்படுத்தியது. ஆனால் இன்று நாம் வசதி மற்றும் இலாபத்தைத் தேடிச் சென்றதால் சூழலுக்கு ஏற்பட்டுள்ள பாதிப்பு அளப்பரியது” என்றார்.
உண்மையான ‘சிஸ்டம் சேஞ்ச்’:
அரசாங்கத்தின் “செழிப்பான நாடு – அழகான வாழ்க்கை” என்ற கொள்கையை யதார்த்தமாக்க பிளாஸ்டிக் அச்சுறுத்தலற்ற சூழல் அவசியம். இது வெறும் வாசகமாக மட்டும் நின்றுவிடாமல், நிறுவன ரீதியான ஒருங்கிணைப்பு, உற்பத்தியாளர்களின் அர்ப்பணிப்பு மற்றும் மக்களின் நடத்தையில் மாற்றம் கொண்ட உண்மையான “சிஸ்டம் சேஞ்ச்” (System Change) ஆக அமைய வேண்டும் என்றும் அவர் கேட்டுக்கொண்டார்.
மேல் மாகாணத்தின் உள்ளூராட்சி மன்றத் தலைவர்கள் மற்றும் சிரேஷ்ட அதிகாரிகளுக்கு இதன்போது விழிப்புணர்வு ஊட்டப்பட்டதுடன், இது ஒரு முன்னோடித் திட்டமாக ஆரம்பிக்கப்பட்டு எதிர்காலத்தில் நாடு முழுவதும் விரிவுபடுத்தப்படவுள்ளது.
