நாட்டில் இருபத்திரண்டு மில்லியன் மக்கள் முகங்கொடுத்துவரும் பாரிய பிரச்சினைகளுக்கு இந்த வரவு செலவுத் திட்டத்தில் எந்தவொரு தீர்வும் முன்வைக்கப்படவில்லை என எதிர்க்கட்சித் தலைவர் சஜித் பிரேமதாச தெரிவித்துள்ளார்.
ஜனாதிபதியின் வரவு செலவுத் திட்ட உரை நிறைவடைந்த பின்னர், பாராளுமன்றக் கட்டிடத் தொகுதியில் ஊடகங்களுக்குக் கருத்துத் தெரிவிக்கும்போதே அவர் இதனைக் குறிப்பிட்டார்.
பொருட்களின் விலை அதிகரிப்பு, பணவீக்கம் மற்றும் வாழ்க்கைச் செலவு உயர்வு ஆகிய மக்களின் ஜீவனோபாயப் போராட்டத்திற்கு இதில் எந்தப் பதிலும் இல்லை என அவர் சுட்டிக்காட்டினார். உலக வங்கியின் தரவுகளின்படி நாட்டின் வறுமை நிலை அறுபது சதவீதத்திற்கும் அதிகமாக உள்ள போதிலும், வறுமை ஒழிப்பிற்கான பிரயோக ரீதியான வேலைத்திட்டங்கள் எதுவும் முன்வைக்கப்படவில்லை என அவர் குற்றம் சுமத்தினார்.
மேலும், நாட்டின் மொத்த உள்நாட்டு உற்பத்தியில் ஐம்பத்திரண்டு சதவீதப் பங்களிப்பை வழங்கும் நுண், சிறிய மற்றும் நடுத்தர தொழில்முயற்சியாளர்களுக்கு எவ்வித நிவாரணமும் வழங்கப்படவில்லை எனவும், இளம் தொழில்முயற்சியாளர்களுக்கு அவசியமான ஆரம்ப மற்றும் செயற்பாட்டு மூலதனங்கள் ஒதுக்கப்படவில்லை எனவும் சஜித் பிரேமதாச தெரிவித்தார்.
ஜனாதிபதி ஐந்து மணித்தியாலங்கள் ஆற்றிய உரையானது எவ்விதத் தீர்வுகளுமற்ற, மனிதநேயமற்ற, ‘கிளிப்பிள்ளை’ போன்றதொரு வரவு செலவுத் திட்டமே என எதிர்க்கட்சித் தலைவர் மேலும் குறிப்பிட்டார்.
