மஸ்கெலியா விசேட நிருபர்.
நாட்டின் அபிவிருத்தி நடவடிக்கைகள் தொடர்பில் வழங்கப்பட்ட அறிவுறுத்தல்களை உரிய முறையில் நடைமுறைப்படுத்தாத அரச நிறுவனங்களின் தலைவர்களுக்கு எதிராக நடவடிக்கை எடுக்கப்படும் என ஜனாதிபதி ரணில் விக்ரமசிங்க தெரிவித்துள்ளார்.
மாவட்ட அபிவிருத்திக் குழுக் கூட்டங்களில் எடுக்கப்படும் தீர்மானங்களை அமுல்படுத்துவதற்கு அரச அதிகாரிகள் துரிதமாக செயற்பட வேண்டுமென தெரிவித்த ஜனாதிபதி, நாட்டை பின்னோக்கி கொண்டு செல்லும் எந்தவொரு வேலைத்திட்டத்திற்கும் இடமளிக்கப் போவதில்லை எனவும் வலியுறுத்தினார்.
நுவரெலியா மாவட்ட செயலகத்தில் இன்று (04) இடம்பெற்ற விசேட மாவட்ட ஒருங்கிணைப்புக் குழுக் கூட்டத்தில் கலந்து கொண்ட ஜனாதிபதி ரணில் விக்கிரமசிங்க இதனைக் குறிப்பிட்டுள்ளார்.
இந்நிகழ்வில் மாவட்ட அரசியல் அதிகாரம் மற்றும் அரச அதிகாரிகள் இருவருமே அழைக்கப்பட்டதுடன் நுவரெலியா மாவட்டத்தின் அபிவிருத்திக்காக இதுவரை அமுல்படுத்தப்பட்டுள்ள வேலைத்திட்டம் மற்றும் எதிர்கால அபிவிருத்தி திட்டங்கள் தொடர்பில் நீண்ட கலந்துரையாடல் இடம்பெற்றது.
மேலும், 2022 டிசம்பர் 22 மற்றும் 2023 ஏப்ரல் 10 ஆகிய தேதிகளில் ஜனாதிபதி தலைமையில் நடைபெற்ற கலந்துரையாடலின் போது எடுக்கப்பட்ட தீர்மானங்களை நடைமுறைப்படுத்துவதற்கான முன்னேற்றம் குறித்து ஆராயப்பட்டது.
மருத்துவமனைகளில் உள்ள மருந்துப் பற்றாக்குறையைத் தீர்ப்பது, பள்ளி ஆசிரியர் பற்றாக்குறையைத் தீர்ப்பது, சாலைகள் சீரமைப்பது, குடிநீர்ப் பிரச்னைக்குத் தீர்வு காண்பது உள்ளிட்ட உள்கட்டமைப்பு மேம்பாட்டிற்கு எடுக்கப்பட்டுள்ள துரித நடவடிக்கைகள் குறித்தும், அதன் முன்னேற்றம் குறித்தும் அதிகாரிகள் எடுத்துரைத்தனர்.
அத்துடன், அந்த வேலைத்திட்டங்களை நடைமுறைப்படுத்துவதில் ஏற்பட்டுள்ள பிரச்சினைகள் ஜனாதிபதியிடம் நேரடியாக முன்வைக்கப்பட்டு தீர்வு காணப்பட்டது.
நுவரெலியா மாவட்டத்தை உள்நாட்டு மற்றும் வெளிநாட்டு சுற்றுலாப் பயணிகளின் கவர்ச்சிகரமான மற்றும் வசதியான சுற்றுலாத் தலமாக மாற்றுவதற்கு எடுக்கப்பட்ட தீர்மானங்களை விரைவாக நடைமுறைப்படுத்துவதன் மூலம் நாட்டின் பொருளாதாரத்திற்கு பெரும் பங்களிப்பை வழங்க முடியும் என ஜனாதிபதி சுட்டிக்காட்டினார்.
அத்துடன், சுற்றுலாத் துறைக்கு முதலீட்டாளர்களை ஈர்க்கும் வகையில், அரசாங்க அதிகாரிகள் வழங்கிய அறிவுறுத்தல்களுக்கு அமைவாக தனது பொறுப்புகளை உடனடியாக நிறைவேற்ற வேண்டியதன் அவசியத்தையும் ஜனாதிபதி வலியுறுத்தினார்.
