நேற்று இரவு முதல் லுணுகலை, பசறை , நமுனுகுலை ஆகிய பகுதிகளில் பலத்த காற்று வீசுவதனால் அப்பிரதேசங்களில் பாரிய சேதங்கள் ஏற்பட்டுள்ளன.
இன்று காலை பசறை பண்டாரவளை வீதியில் காற்றின் காரணமாக பசறை நமுனுகுலை வீதியில் 12 ம் கட்டைப் பகுதியில் பாரிய மரங்கள் முறிந்து விழுந்தமையினாலும் அதே வீதியில் அம்பலம் பகுதியில் பாரிய மரமொன்று முறிந்து விழுந்தமையினால் பசறை பண்டாரவளை க்கான போக்குவரத்து முற்றாக தடைப்பட்டுள்ளதோடு மரங்களை அப்புறப்படுத்தும் நடவடிக்கைகளில் படையினர் ஈடுபட்டு வருகின்றனர்.
மேலும் ஹொப்டன் 19 ம் கட்டைப் பெருந்தோட்ட பகுதியில் வீடொன்றின் மீது மரம் முறிந்து விழுந்தமையினால் குறித்த வீட்டில் பெண்ணொருவர் காயமுற்ற நிலையில் லுணுகலை வைத்தியசாலையில் சிகிச்சை பெற்ற பின்னர் மேலதிக சிகிச்சைகளுக்காக பதுளை போதனா வைத்தியசாலையில் மாற்றப்பட்டு சிகிச்சை பெற்று வருகிறார்
அத்துடன் லுணுகலை பொலிஸ் சோதனை சாவடியின் மேல் மரக்கிளை ஒன்று முறிந்து விழுந்தமையினால் குறித்த சோதனை சாவடி சேதமடைந்துள்ளது.
லுணுகலையில் இருந்து ஜனதாபுர ஊடாக மடூல்சீமை செல்லும் வீதி ஜனதாபுர பகுதியில் வீதியில் மின்கம்பம் ஒன்று முறிந்து விழுந்தமையினால் அவ்வீதியிலான போக்குவரத்து தடைப்பட்டிருந்தது.
அத்துடன் நமுனுகுலை பொலிஸ் நிலையத்தின் கூரைகள் காற்றினால் சேதமடைந்துள்ளதோடு நமுனுகுலை பகுதியில் பம்பரகல பத்தன, கந்தசேன , இந்துகல, பிங்கராவ , கனவரல்ல ஆகிய பகுதிகளில் வீட்டு கூரைகள் காற்றினால் சேதமடைந்துள்ளதோடு சில வீடுகளுக்கு மேல் மரக்கிளைகளும் முறிந்து விழுந்துள்ளன.
பசறை பகுதியில் கோணக்கலை மேற்பிரிவில் வீடொன்றின் மீது மரம் ஒன்று முறிந்து விழுந்தமையினால் குறித்த வீடு சேதமடைந்ததோடு அப்பகுதியிலும் சில வீட்டு கூரைகள் காற்றினால் சேதமடைந்துள்ளன.
மேலும் மீதும்பிடிய , எல்டப், டெமேரியா, மீரியபெத்த, கமேவெல, ஆக்கரத்தன்ன, பசறை நகர் ஆகிய பகுதிகளிலும் காற்றினால் கூரைகள் சேதமடைந்துள்ளன. மேலும் மடூல்சீமை , றோபேரி பகுதிகளில் வீட்டு கூரைகள் காற்றினால் சேதமடைந்துள்ளன.
அத்துடன் பசறையிலிருந்து இங்குருகடுவ செல்லும் வழியாக புத்தல செல்லும் வீதியில் பாரிய மரங்கள் முறிந்து விழுந்தமையினால் குறித்த வீதியுடனான போக்குவரத்து தடைப்பட்டிருந்தது.
இக்காற்றின் காரணமாக அன்றாட தொழிலில் ஈடுபடுவோரும் பெருந்தோட்டப் பகுதிகளில் தோட்ட தொழிலில் ஈடுபடுவோரும் பாரிய அசௌகரியங்களை எதிர்நோக்குவதோடு இன்று இப்பகுதிகளில் பாடசாலை மாணவர்களின் வருகையும் மிகவும் குறைந்த அளவில் காணப்பட்டதோடு பாடசாலைக்கு வருகை தந்த மாணவர்களை மீணடும் பெற்றோர்களுடன் வீடுகளுக்கு அழைத்து செல்வதனை காணக்கூடியதாக இருந்தது.
ராமு தனராஜா
