உலக முடிவில் செல்பி எடுக்கும் போது தவறி விழுந்த மாணவி பாதுகாப்பாக மீட்பு!
மரணத்தின் விளிம்பிலிருந்து மீண்ட மாணவி. உலக முடிவில் (World’s End) ஒரு திகில் ‘செல்பி’ விபரீதம்.
நுவரெலியா ஹோட்டன் சமவெளியின் புகழ்பெற்ற ‘உலக முடிவு’ (World’s End) பகுதியில் இன்று ஒரு மயிர்க்கூச்சரியும் சம்பவம் நிகழ்ந்துள்ளது.
பேராதனைப் பல்கலைக்கழகத்தைச் சேர்ந்த மாணவி ஒருவர், உலக முடிவின் அந்த பிரம்மாண்டமான விளிம்பில் நின்று ‘செல்பி’ எடுக்க முயன்றபோது, எதிர்பாராதவிதமாக கால் தடுமாறி சுமார் 40m அதிகமான ஆழமான பள்ளத்திற்குள் சரிந்து விழுந்துள்ளார்.
மாணவி விழுந்ததைக் கண்டு அதிர்ச்சியில் உறைந்த சக நண்பர்கள் மற்றும் சுற்றுலாப் பயணிகள் உடனடியாக பாதுகாப்புப் பிரிவினருக்குத் தகவல் வழங்கினர். அடுத்த சில நிமிடங்களிலேயே இராணுவத்தினர் மற்றும் வனவிலங்கு அதிகாரிகள் களத்தில் குதித்தனர்.
சுமார் 4,000 அடி ஆழம் கொண்ட அந்த செங்குத்தான மலைச்சரிவில், கடும் பனிமூட்டத்திற்கு மத்தியில் கயிறுகளைப் பயன்படுத்தி இராணுவத்தினர் கீழே இறங்கி பாரிய தேடுதல் வேட்டையை நடத்தினர். பல மணிநேரப் போராட்டத்திற்குப் பிறகு, மரஞ்செடிகளுக்கு இடையே சிக்கியிருந்த அந்த மாணவி உயிருடன் மீட்கப்பட்டார்.
அதிர்ஷ்டவசமாக தப்பிய உயிர்.
தற்போது அந்த மாணவி மீட்கப்பட்டு நுவரெலியா பொது வைத்தியசாலையில் சிகிச்சைக்காக அனுமதிக்கப்பட்டுள்ளார். அவருக்கு காயங்கள் ஏற்பட்டிருந்தாலும், அவர் ஆபத்தான கட்டத்தைத் தாண்டிவிட்டதாக மருத்துவர்கள் உறுதி செய்துள்ளனர்.
”ஒரு நிமிட கவனக்குறைவு, ஒரு வாழ்நாளின் முடிவாகிவிடும்.” உலக முடிவுப் பகுதியில் நிலவும் பலத்த காற்று மற்றும் வழுக்கும் தன்மை காரணமாக, விளிம்புப் பகுதிகளில் நின்று புகைப்படம் எடுப்பதைத் தவிர்க்குமாறு அதிகாரிகள் மீண்டும் மீண்டும் வலியுறுத்தியுள்ளனர்.
கஜரூபன் திவ்யா நுவரெலியா
