கிரிந்திவெல மூதாட்டி கொலை: 38 நாட்களின் பின் 67 வயது சந்தேக நபர் கைது!
கிரிந்திவெல: கிரிந்திவெல பகுதியில் 79 வயதுடைய மூதாட்டியை வன்புணர்ந்து, கழுத்தை நெரித்து கொலை செய்த பின், அவரது காதுகளை அறுத்து தங்கத் தோடுகளை கொள்ளையிட்ட பிரதான சந்தேக நபர் கைது செய்யப்பட்டுள்ளார்.
கடந்த 18ஆம் திகதி கிரிந்திவெல, ஹிஸ்வெல்ல பகுதியில் வசித்து வந்த ஆர்.டி. திலகா மாலினி ஜயரத்ன எனும் வயது முதிர்ந்த பெண், தனது வீட்டில் தனியாக இருந்தபோது மிகக் கொடூரமான முறையில் படுகொலை செய்யப்பட்டிருந்தார். இச்சம்பவம் அப்பகுதியில் பெரும் அதிர்ச்சியை ஏற்படுத்தியிருந்தது.
சம்பவம் தொடர்பில் கடந்த 38 நாட்களாக கிரிந்திவெல பொலிஸார் தீவிர விசாரணைகளை முன்னெடுத்து வந்தனர். பல்வேறு கோணங்களில் முன்னெடுக்கப்பட்ட இந்த நீண்ட விசாரணைகளின் பலனாக, ஞாயிற்றுக்கிழமை (26) அன்று 67 வயதுடைய பிரதான சந்தேக நபர் கைது செய்யப்பட்டார்.
கைது செய்யப்பட்ட சந்தேக நபரிடம் நடத்தப்பட்ட விசாரணையின் அடிப்படையில், கொலையைச் செய்ய பயன்படுத்தப்பட்ட கூர்மையான கத்தி மற்றும் சம்பவத்தின் போது அவர் அணிந்திருந்த ஆடைகள் என்பன பொலிஸாரால் கைப்பற்றப்பட்டுள்ளன. இவை கிரிந்திவெல – கிரிமெட்டியவத்த பகுதியில் உள்ள சந்தேக நபரின் சகோதரியின் வீட்டில் மறைத்து வைக்கப்பட்டிருந்தமை குறிப்பிடத்தக்கது.
கைது செய்யப்பட்ட சந்தேக நபரிடம் மேலதிக விசாரணைகளை மேற்கொண்டு வரும் பொலிஸார், அவரை விரைவில் நீதிமன்றில் முன்னிலைப்படுத்த நடவடிக்கை எடுத்துள்ளனர். கிரிந்திவெல பொலிஸார் மேலதிக விசாரணைகளை தொடர்ந்து முன்னெடுத்து வருகின்றனர்.
