ஹட்டன் புனித ஜோன் பொஸ்கோ கல்லூரியின் பழைய மாணவர் சங்கத்தினால் ஏற்பாடு செய்யப்பட்ட பாடசாலைகளுக்கிடையிலான கணித விஞ்ஞான திறன் வருடாந்த விருத்திப் போட்டிப்பரீட்சை.

க.பொ.த சாதாரணதர மாணவர்களின் திறனை கணிதம் மற்றும் விஞ்ஞான பாடங்களில் மென்மேலும் அதிகரிக்கும் நோக்கத்தோடு பாடசாலைகளுக்கிடையிலான கணித விஞ்ஞான திறன் வருடாந்த விருத்திப் போட்டிப்பரீட்சை , இம்முறை தமிழ் மற்றும் சிங்கள மொழிகளில் கடந்த 4ஆம் திகதியன்று, ஹட்டன் புனித ஜோன் பொஸ்கோ கல்லூரியின் பழைய மாணவர் சங்கத்தினால் ஏற்பாடு செய்யப்பட்டு வெற்றிகரமாக நடந்தேறியது.

இப்போட்டிப் பரீட்சைக்கு மொத்தமாக 41 பாடசாலைகளைச் சேர்ந்த சுமார் 197 மாணவ மாணவிகள் தோற்றியது விசேட அம்சமாகும்.

இப்போட்டிப் பரீட்சையில் பங்குபற்றிய சகல மாணவ மாணவிகளும் சான்றிதழ்கள் வழங்கி கௌரவிக்கப்பட்டனர். மேலும் நான்காம் இடம் தொடக்கம் இருபதாம் இடத்தைப் பெற்ற மாணவ மாணவிகளுக்கு விசேட சான்றிதழ்கள் வழங்கி கௌரவிக்கப்பட்டதுடன், முதல் மூன்று இடங்களைப் பெற்ற மாணவ மாணவிகள் பதக்கம் அணிவித்தும் விசேட சான்றிதழ்கள் வழங்கியும் கௌரவிக்கப்பட்டனர்.

அதுமட்டுமன்றி இப்போட்டியில் பங்குபற்றிய மாணவ மாணவிகள் பெற்றுக்கொண்ட மொத்த புள்ளிகளின் அடிப்படையில், தமிழ் மொழி மூலமாக தோற்றிய பாடசாலைகளில் முதல் 5 இடங்களைப் பெற்ற பாடசாலைகளுக்கும், சிங்கள மொழி மூலமாக தோற்றிய பாடசாலைகளில் முதல் 2 இடங்களைப் பெற்ற பாடசாலைகளுக்கும் கிண்ணங்கள் வழங்கி கௌரவிக்கப்பட்டன.