புத்தளத்தில் மீண்டும் சிறுவர் கடத்தல் முயற்சி: முகக்கவசம் அணிந்த மர்ம நபர்களால் பரபரப்பு
புத்தளம், அல்-ஹஸனாத் வீதியில் மத்ரஸா முடிந்து வீடு திரும்பிக் கொண்டிருந்த சிறுவர்களைக் கடத்துவதற்கு மர்ம நபர்கள் முயற்சித்துள்ள சம்பவம் அப்பகுதியில் பெரும் அச்சத்தையும் பரபரப்பையும் ஏற்படுத்தியுள்ளது.
சம்பவம் குறித்து தெரியவருவதாவது:
கடந்த செவ்வாய்க்கிழமை (10) காலை, அல்-ஹஸனாத் பள்ளிவாசல் வீதி, எட்டாவது ஒழுங்கையில் அமைந்துள்ள குர்ஆன் மத்ரஸாவில் பாடங்களை முடித்துவிட்டு இரண்டு சிறுவர்கள் வீடு திரும்பிக் கொண்டிருந்தனர். இதன்போது, வீதியோரத்தில் நிறுத்தி வைக்கப்பட்டிருந்த வெள்ளை நிற வாகனத்தில் இருந்த முகக்கவசம் அணிந்த நான்கு மர்ம நபர்கள் திடீரென சிறுவர்களைத் துரத்தியுள்ளனர்.
இதனால் அதிர்ச்சியடைந்த சிறுவர்கள், சுதாகரித்துக்கொண்டு அங்கிருந்து வேகமாக ஓடித் தப்பித்துள்ளனர். குறித்த நபர்கள் தங்களைத் துரத்தியதாக சிறுவர்கள் அச்சத்துடன் தெரிவித்துள்ளனர்.
இதேபோன்றதொரு கடத்தல் முயற்சி கடந்த வாரமும் இதே வீதியில் இடம்பெற்றுள்ளதாகத் தகவல்கள் தெரிவிக்கின்றன. இச்சம்பவம் உண்மையானது என்பதை அல்-ஹஸனாத் பள்ளிவாசலின் பேஷ் இமாம் உறுதிப்படுத்தியுள்ளார்.
தொடர்ச்சியாக இவ்வாறான சம்பவங்கள் இடம்பெறுவது இப்பகுதி மக்களிடையே பாதுகாப்பற்ற சூழலை உருவாக்கியுள்ளது.
இந்த அபாயகரமான நிலைமை குறித்துப் பெற்றோர்கள் மற்றும் ஊர் முக்கியஸ்தர்கள் ஒன்றிணைந்து பின்வரும் தரப்பினரின் கவனத்திற்குக் கொண்டு சென்றுள்ளனர்:
புத்தளம் மாநகர முதல்வர்,புத்தளம் நகர பள்ளிவாசல் நிர்வாகத்தினர்,புத்தளம் காவல்துறை (Police)
சிறுவர்களின் பாதுகாப்பை உறுதிப்படுத்தவும், குறித்த மர்ம நபர்களைக் கண்டறியவும் உடனடியாக நடவடிக்கை எடுக்குமாறு பொதுமக்கள் கோரிக்கை விடுத்துள்ளனர். பெற்றோர்கள் தங்கள் பிள்ளைகளைத் தனியாக அனுப்ப வேண்டாம் எனவும், விழிப்புடன் இருக்குமாறும் கேட்டுக்கொள்ளப்படுகிறார்கள்.
