விளையாட்டைச் சமூக நலனுக்கான கருவியாக மாற்றும் நோக்கில் ‘ஹெல்ப்பிங் ஹேண்ட்ஸ்’ அமைப்பு நடாத்திய மாபெரும் கிரிக்கெட் போட்டி!
விளையாட்டை வெறும் பொழுதுபோக்காக மட்டுமல்லாமல், சமூக நலனுக்கான ஒரு வலிமையான கருவியாக மாற்றும் உன்னத நோக்கில் ‘Helping Hands’ அமைப்பின் ஏற்பாட்டில் மாபெரும் கிரிக்கெட் போட்டி வெற்றிகரமாக நடத்தப்பட்டுள்ளது.
ஒவ்வொரு ஆண்டும் தேவையுடைய குடும்பங்களை அடையாளம் கண்டு, அவர்களுக்குத் தொடர்ச்சியான ஆதரவை வழங்கும் வகையில் இத்தகைய சமூகப் பணிகளைத் தொடர்ந்து முன்னெடுத்துச் செல்ல ‘Helping Hands’ அமைப்பு திட்டமிட்டுள்ளது. இச்சமூக நலப் பணியில் பங்களிக்க விரும்பும் நல்ல உள்ளங்கள் தங்களைத் தொடர்பு கொள்ளலாம் எனவும் அமைப்பினர் அழைப்பு விடுத்துள்ளனர்.
நேற்றைய( 27) தினம் கொழும்பு சீவலி பாடசாலை மைதானத்தில் நடைபெற்ற இப்போட்டியில், மிகுந்த எழுச்சியுடன் 16 அணிகள் கலந்துகொண்டு தமது திறமைகளை வெளிப்படுத்தின.
போட்டியின் நிறைவில் முதலாம் மற்றும் இரண்டாம் இடங்களைப் பெற்ற அணிகளுக்கு வெற்றிக் கோப்பைகள் வழங்கி வைக்கப்பட்டதுடன், சிறந்த துடுப்பாட்ட வீரர், சிறந்த பந்துவீச்சாளர் மற்றும் சிறந்த விளையாட்டு வீரர் ஆகியோரும் சிறப்புச் செய்யப்பட்டுள்ளனர். அத்துடன், இப்போட்டியில் பங்குபற்றிய 16 அணிகளையும் கவுரவிக்கும் வகையில் விசேட சின்னங்களும் வழங்கப்பட்டன.
இத்தோடு, காலமான இரு விளையாட்டு வீரர்களை இந்நேரத்தில் நினைவு கூர்ந்து, அவர்களின் குடும்பத்தினருக்கு கௌரவ நினைவுச் சின்னம் ஒன்றும் வழங்கி வைக்கப்பட்டது பார்வையாளர்கள் மத்தியில் நெகிழ்ச்சியை ஏற்படுத்தியது.
இந்த விழாவை எவ்வித குறைவுமின்றி மிக நேர்த்தியாகவும் வெற்றிகரமாக ஏற்பாடு செய்திருந்த திரு. விக்னேஷ்வரன் அவர்களின் அர்ப்பணிப்பான சேவையை இதன்போது பலரும் பாராட்டியமை குறிப்பிடத்தக்கது.
