ஆரம்பத்திலேயே கண்டறிந்தால் புற்றுநோயை வெல்லலாம்: கொட்டாஞ்சேனையில் பெண்களுக்கான இலவச மார்பக மற்றும் கர்ப்பப்பை வாய் புற்றுநோய் பரிசோதனை முகாம்!
உலகெங்கும் அக்டோபர் மாதம் சர்வதேச மார்பகப் புற்றுநோய் விழிப்புணர்வு மாதமாக அனுசரிக்கப்பட்டு வருகிறது. பெண்களிடையே நாளுக்கு நாள் அதிகரித்து வரும் புற்றுநோய் பாதிப்புகளைத் தடுத்து விழிப்புணர்வை ஏற்படுத்தும் உன்னத நோக்கில், விசேட கருத்தரங்கும் இலவச மருத்துவப் பரிசோதனை முகாமும் எதிர்வரும் சனிக்கிழமை (ஒக்டோபர் 24) கொட்டாஞ்சேனையில் நடைபெறவுள்ளது.
இலங்கையில் பெண்களுக்கு ஏற்படும் புற்றுநோய்களில் மார்பகப் புற்றுநோய் முதலிடத்திலும், கர்ப்பப்பை வாய் புற்றுநோய் (Cervical Cancer) இரண்டாம் இடத்திலும் உள்ளன. சுகாதார அமைச்சின் புள்ளிவிபரங்களின்படி, நாட்டில் நாள்தோறும் சுமார் 14 முதல் 15 பெண்கள் மார்பகப் புற்றுநோயினால் புதிதாக அடையாளம் காணப்படுகின்றனர். அத்துடன் தினமும் குறைந்தது 2 முதல் 3 பெண்கள் இந்நோய்களினால் உயிரிழக்க நேரிடுகிறது.
இத்தகைய உயிரிழப்புகளுக்குப் பிரதான காரணம், நோயின் அறிகுறிகள் முற்றிய பின்னரே பெண்கள் மருத்துவரை நாடுவதாகும். ஆனால், மார்பகப் புற்றுநோயும் கர்ப்பப்பை வாய் புற்றுநோயும் ஆரம்ப நிலையிலேயே கண்டறியப்பட்டால், 100% வரை முழுமையாகக் குணப்படுத்தக்கூடியவை என்பது மருத்துவ ரீதியாக நிரூபிக்கப்பட்ட உண்மையாகும்.
பரிசோதனைகள் ஏன் அவசியம்?
மார்பகப் புற்றுநோய் பரிசோதனை (Clinical Breast Examination): ஆரம்ப கட்டத்தில் மார்பகத்தில் ஏற்படும் கட்டிகள் வலியை ஏற்படுத்துவதில்லை என்பதால், பல பெண்கள் அதனை அலட்சியப்படுத்தி விடுகின்றனர். மருத்துவர் மூலம் செய்யப்படும் முறையான மருத்துவப் பரிசோதனை, கட்டிகள் தீவிரமடைவதற்கு முன்னரே அவற்றைக் கண்டறிந்து, சிக்கலான அறுவை சிகிச்சைகள் இன்றி உயிரைப் பாதுகாக்க உதவுகிறது.
கர்ப்பப்பை வாய் புற்றுநோய் பரிசோதனை (Pap Smear Test): கர்ப்பப்பை வாய்ப் புற்றுநோய் உடனடியாகத் தோன்றுவதில்லை. புற்றுநோயாக மாறுவதற்கு முந்தைய ஆரம்ப மாற்றங்களை (Pre-cancerous changes) மிக எளிதாகக் கண்டறியும் ஒரே வழி ‘பாப் ஸ்மியர்’ பரிசோதனை மட்டுமே. தேசிய சுகாதார வழிகாட்டல்களுக்கு அமைய, 35 வயது பூர்த்தியடைந்த பெண்களுக்கும் மற்றும் சந்தேகத்திற்கிடமான மருத்துவ அறிகுறிகள் அல்லது வரலாறு உள்ள பெண்களுக்கும் இப்பரிசோதனை பரிந்துரைக்கப்படுகிறது. 35 வயதில் மேற்கொள்ளப்படும் முதல் பரிசோதனையைத் தொடர்ந்து, ஒவ்வொரு 5 ஆண்டுகளுக்கு ஒருமுறையும் இப்பரிசோதனையைத் தொடர்ந்து செய்துகொள்வது கட்டாயமாகும்.
வழிகாட்டலும் ஒருங்கிணைப்பும்:
கொழும்பு மாநகர சபை பொது சுகாதாரத் திணைக்களத்தின் தலைமை மருத்துவ அதிகாரி (CMHO) Dr. K. ஸ்ரீபிரதாபன் அவர்களின் வழிகாட்டலிலும், வட்டாரம் 1 சுகாதார வைத்திய அதிகாரி (District 1 MOH) Dr. பவித்ரா முத்துகுட அவர்களின் மருத்துவ மேற்பார்வையிலும், கொட்டாஞ்சேனை கிழக்கு வட்டார கொழும்பு மாநகர சபை உறுப்பினர் காயத்ரி விக்ரமசிங்க அவர்களின் நெறிப்படுத்தலிலும் இந்நிகழ்வு முன்னெடுக்கப்படவுள்ளது. ‘ஷீ லீட்ஸ்’ (She Leads) மகளிர் அமைப்பும் கொட்டாஞ்சேனை கிழக்கு ‘பிரஜாசக்தி’ அமைப்பும் இணைந்து இதனை ஏற்பாடு செய்துள்ளன.
இந்நிகழ்வில் கொழும்பு மாநகர முதல்வர் கௌரவ வ்ராய் கெலி பல்தசார் அவர்கள் பிரதம விருந்தினராகக் கலந்து சிறப்பிக்கவுள்ளார்.
நிகழ்வு விபரங்கள்:
திகதி: 2026 ஒக்டோபர் 24, சனிக்கிழமை
நேரம்: காலை 9:00 மணி முதல் நண்பகல் 12:00 மணி வரை
இடம்: கத்தீட்ரல் ஆண்கள் பாடசாலை, இல. 82, கொட்டாஞ்சேனை வீதி, கொழும்பு 13
அனுமதி: முற்றிலும் இலவசம்
முகாமில் வழங்கப்படும் சேவைகள்:
புற்றுநோய் விழிப்புணர்வு மற்றும் சுய மார்பகப் பரிசோதனை (Self Breast Exam) செய்முறை விளக்கம்.
விசேட பெண் மருத்துவர்கள் மற்றும் சுகாதார நிபுணர்களால் முன்னெடுக்கப்படும் நேரடி மார்பகப் பரிசோதனை.
தேசிய வழிகாட்டலின்படி 35 வயதுடைய பெண்கள் மற்றும் சந்தேகத்திற்கிடமான அறிகுறிகள் உள்ளவர்களுக்கான இலவச பாப் ஸ்மியர் (Pap Smear) பரிசோதனை.
குடும்பத்தின் நலனுக்காக ஓயாது உழைக்கும் பெண்கள், தங்கள் சொந்த உடல்நலனில் கவனம் செலுத்துவது மிக அவசியம். கூச்சத்தையோ அச்சத்தையோ விடுத்து, 35 வயதுக்கு மேற்பட்ட பெண்கள் மற்றும் குடும்பத் தலைவிகள் இந்த அரிய வாய்ப்பைப் பயன்படுத்தி, தவறாது வருகை தந்து பரிசோதனைகளை மேற்கொண்டு பயன்பெறுமாறு அன்போடு அழைக்கின்றோம்.
ஆக்கம் / தகவல்:
அகல்யா ராஜேந்திரன்தலைவி ‘ஷீ லீட்ஸ்’ மகளிர் இயக்கம் (She Leads Women’s Action Society), கொட்டாஞ்சேனை கிழக்கு வட்டாரம்.
