கம்பஹா மாவட்டத்தின் கிரிந்திவெல – ஹங்வெல்ல வீதியில் அமைந்துள்ள திரையரங்கு ஒன்றில் மறைத்து வைக்கப்பட்டிருந்த பெருமளவு ஆயுதங்கள், தோட்டாக்கள் மற்றும் கைக் குண்டுகளுடன் சந்தேக நபர் ஒருவர் கைது செய்யப்பட்டுள்ளார்.
கொழும்பு மாவட்ட குற்றத்தடுப்புப் பிரிவினருக்கு நேற்று (17) மாலை கிடைத்த தகவலையடுத்து, குறித்த திரையரங்கில் மேற்கொள்ளப்பட்ட பரிசோதனையின் போதே இவை கண்டுபிடிக்கப்பட்டுள்ளன.
இதன்போது, மில்லத்தே பகுதியைச் சேர்ந்த 38 வயதுடைய நபரொருவரே இவ்வாறு கைது செய்யப்பட்டுள்ளார்.
அங்கு மேற்கொள்ளப்பட்ட சோதனையின் போது, வெளிநாட்டில் தயாரிக்கப்பட்ட பிஸ்டல்கள், ரிவால்வர், ரிப்பீட்டர் மற்றும் போர் 12 ரக துப்பாக்கிகள் உள்ளிட்ட ஆயுதங்களுடன், ஆயிரக்கணக்கான தோட்டாக்களும், இரண்டு கைக் குண்டுகளும் பொலிஸாரால் கைப்பற்றப்பட்டுள்ளன.
இந்தச் சம்பவம் குறித்து கொழும்பு மாவட்ட குற்றத்தடுப்புப் பிரிவினர் மேலதிக விசாரணைகளை மேற்கொண்டு வருகின்றனர்.
