கலகொடஅத்தே ஞானசார தேரரை விடுவிப்பது தொடர்பில், மகாநாயக்க தேரர்கள் இதுவரை அரசாங்கத்திடம் எவ்விதக் கோரிக்கையும் விடுக்கவில்லை என அமைச்சரவைப்பேச்சாளர், அமைச்சர் நளிந்த ஜயதிஸ்ஸ தெரிவித்துள்ளார்.
இன்று நடைபெற்ற அமைச்சரவை முடிவுகளை அறிவிக்கும் ஊடகவியலாளர் சந்திப்பில் எழுப்பப்பட்ட கேள்விக்குப் பதிலளிக்கையிலேயே அவர் இதனைக் குறிப்பிட்டார்.
ஞானசார தேரரை விடுவிக்குமாறு மகாநாயக்க தேரர்கள் கோரிக்கை விடுத்ததாகக் கூறப்பட்டாலும், அரசாங்கம் எப்போதும் நாட்டின் சட்டத்திற்கு உட்பட்டே செயற்படும் எனவும், சட்டத்திற்கு அப்பாற்பட்டு எவ்வித மாற்றங்களையும் செய்யப் போவதில்லை எனவும் அமைச்சர் தெளிவுபடுத்தினார்.
எனினும், முப்பீட மகாநாயக்க தேரர்களால் சிறைச்சாலைகள் ஆணையாளருக்கு அனுப்பப்பட்ட கடிதத்திற்கு அமையவும், மகாநாயக்க தேரர்களின் பிரதிநிதிகளுடன் நடத்தப்பட்ட விசேட பேச்சுவார்த்தைகளின் அடிப்படையிலும் சிறைச்சாலை நிலையியல் கட்டளைகள் திருத்தப்பட்டுள்ளதாக அவர் தெரிவித்தார்.
இந்தத் திருத்தப்பட்ட கட்டளைகளுக்கு அமையவே எதிர்கால நடவடிக்கைகள் முன்னெடுக்கப்படும் எனவும், நீதிமன்றத்தால் வழங்கப்பட்ட தீர்ப்பை நீதிமன்றத்திற்கு அப்பாற்பட்டு மாற்றியமைக்கும் எண்ணம் அரசாங்கத்திற்கு இல்லை எனவும் அமைச்சர் நளிந்த ஜயதிஸ்ஸ மேலும் குறிப்பிட்டுள்ளார்.
