நாட்டின் பல பகுதிகளில் உள்ள பன்றிப் பண்ணைகளில் ‘ஆப்பிரிக்க பன்றி காய்ச்சல்’ நோய் மீண்டும் பதிவாகி வருவதாகச் சுகாதாரத் துறையினர் எச்சரித்துள்ளனர்.
கொழும்பு, கம்பஹா, களுத்துறை, அநுராதபுரம், கண்டி மற்றும் புத்தளம் ஆகிய மாவட்டங்களில் உள்ள 48 பண்ணைகளில் மேற்கொள்ளப்பட்ட சோதனைகளின் போது, இந்த வைரஸ் தொற்றால் பாதிக்கப்பட்ட பன்றிகள் கண்டறியப்பட்டுள்ளதாக விலங்கு உற்பத்தி மற்றும் சுகாதார திணைக்களத்தின் பிரதான தொற்றுநோயியல் நிபுணர், வைத்தியர் பிரதீப் குமாரவடு தெரிவித்தார்.
கடந்த ஆண்டு கட்டுப்படுத்தப்பட்டிருந்த இந்த நோய் நிலைமை, நடப்பாண்டில் சில பகுதிகளில் மீண்டும் தலைதூக்கியுள்ளதாகத் தெரிவித்த அவர், இது குறித்துப் பொதுமக்கள் மற்றும் பண்ணையாளர்கள் அவதானமாக இருக்குமாறு கேட்டுக்கொண்டுள்ளார்.
குறித்த 48 பண்ணைகளில் நடத்தப்பட்ட பரிசோதனைகள் குறித்து வைத்தியர் பிரதீப் குமாரவடு மேலும் விளக்கமளித்தார்:
“இனப்பெருக்கம் மற்றும் இறைச்சிக்காகப் பன்றிகளை வளர்க்கும் பண்ணைகளிலேயே இந்த நோய் நிலைமை அறிக்கை செய்யப்பட்டுள்ளது. அந்தப் பண்ணைகளிலிருந்து சுமார் 1,200 பன்றிகளைப் பரிசோதித்துப் பார்த்ததில், கொழும்பு, கம்பஹா, களுத்துறை, அநுராதபுரம், கண்டி மற்றும் புத்தளம் ஆகிய மாவட்டங்களில் நடத்தப்பட்ட சோதனைகளில் சுமார் 200 விலங்குகளுக்குத் தொற்று இருப்பது உறுதி செய்யப்பட்டுள்ளது.”
இந்த நோய் மனித நுகர்வுக்குப் பொருத்தமானதா என்ற சந்தேகம் குறித்துப் பதிலளித்த அவர், இது மனிதர்களுக்குப் பரவும் ஒரு நோய் (Zoonotic disease) அல்லவென்றும், மனிதர்களுக்கு இதனால் எந்தவித ஆபத்தும் இல்லை என்றும் தெளிவுபடுத்தினார்.
வைரஸ் பரவலைக் கட்டுப்படுத்துவது தொடர்பில் பண்ணையாளர்கள் மற்றும் தொழில் முயற்சியாளர்களுக்குப் பின்வரும் ஆலோசனைகள் வழங்கப்பட்டுள்ளன:
பண்ணையாளர்கள் தேவையற்ற அச்சம்கொள்ளத் தேவையில்லை எனவும், எனினும் எங்களது தொழில்நுட்ப வழிகாட்டல்களையும் ஆலோசனைகளையும் கட்டாயம் பின்பற்ற வேண்டும் எனவும் கேட்டுக்கொள்ளப்படுகிறார்கள்.
சிறிய அளவில் பன்றி வளர்ப்பில் ஈடுபடும் சிலர், வீடுகளிலேயே விலங்குகளை அறுத்து அவற்றின் கழிவுகளை நீர்நிலைப் பகுதிகளில் கொட்டுவது அவதானிக்கப்பட்டுள்ளது. இவ்வாறு செய்வதால் நோய் மிக விரைவாகப் பரவக்கூடும் என்பதால், கழிவுகளை அகற்றும் போது முறையான நடைமுறைகளைப் பின்பற்றுவது அவசியமாகும்.
