நோட்டன் காபெக்ஸ் தமிழ் வித்தியாலயத்தில் நச்சுத் தூசி தாக்கம்: 15 மாணவர்கள் வைத்தியசாலையில் அனுமதி!
நோட்டன் காபெக்ஸ் தமிழ் வித்தியாலயத்தில் நச்சுத் தூசியால் ஏற்பட்ட ஒவ்வாமை காரணமாக 15 மாணவர்கள் டிக்கோயா – கிளங்கன் ஆதார வைத்தியசாலையில் அனுமதிக்கப்பட்டு சிகிச்சை பெற்று வருகின்றனர்.
இச்சம்பவம் வியாழக்கிழமை (05) பிற்பகல் சுமார் 1 மணியளவில் இடம்பெற்றுள்ளதாக நோட்டன் பொலிஸ் நிலையப் பொறுப்பதிகாரி தெரிவித்தார்.
தரம் 7இல் கல்வி பயிலும் மாணவர் ஒருவர் வகுப்பறைக்குக் கொண்டுவந்த நாரிழைப் (Fiber) பொருளால் தயாரிக்கப்பட்ட உபகரணம் ஒன்றைத் திறந்தபோது, அதிலிருந்து வெளியான தூசியைச் சுவாசித்ததன் காரணமாக 9 மாணவர்களும் 6 மாணவிகளும் ஒவ்வாமை மற்றும் அரிப்புக்கு உள்ளாகியுள்ளனர்.
இதனையடுத்து பாதிக்கப்பட்ட 15 மாணவர்களும் உடனடியாக வைத்தியசாலையில் அனுமதிக்கப்பட்டு சிகிச்சை பெற்று வருகின்றனர்.
இச்சம்பவம் தொடர்பில் மஸ்கெலியா சுகாதார வைத்திய அதிகாரி அலுவலகக் குழுவினர், நோட்டன் பொலிஸார் மற்றும் ஹட்டன் வலயக் கல்விப் பணிப்பாளர் ஆகியோர் பாடசாலைக்கு நேரில் சென்று விசாரணைகளை முன்னெடுத்து வருகின்றனர்.
