நல்லதண்ணி காவல் துறைப் பிரிவுக்கு உட்பட்ட மரே தோட்டத்தில், தீபாவளித் தினத்தன்று (08) ஏற்பட்ட வாய்த்தர்க்கத்தின் காரணமாக கூரிய ஆயுதத்தால் தாக்கி ஒருவர் கொலை செய்யப்பட்டுள்ளார். இச்சம்பவம் அப்பகுதியில் பெரும் அதிர்ச்சியை ஏற்படுத்தியுள்ளது.
தீபாவளித் தினமான நேற்றைய தினம் (08) இருவருக்கிடையில் ஏற்பட்ட சிறு வாய்த்தர்க்கம் பின்னர் முற்றியுள்ளது. இதன் போது ஆத்திரமடைந்த ஒருவரால் மற்றைய நபர் கூரிய ஆயுதத்தால் பலத்த தாக்கத்திற்கு உள்ளாக்கப்பட்டுள்ளார். இத்தாக்குதலில் படுகாயமடைந்த நபர் சம்பவ இடத்திலேயே உயிரிழந்துள்ளார்.
இச்சம்பவத்தில் உயிரிழந்தவர் மஸ்கெலியா, மரே தோட்டம், புதுக்காடு பிரிவைச் சேர்ந்த 27 வயதுடைய இளைஞர் என அடையாளம் காணப்பட்டுள்ளார்.
கொலைச் சம்பவத்துடன் தொடர்புடைய சந்தேகநபர் உடனடியாகக் காவல்துறையினரால் கைது செய்யப்பட்டுள்ளார். கைது செய்யப்பட்டுள்ள சந்தேகநபரை ஹட்டன் நீதிவான் நீதிமன்றத்தில் ஆஜர்படுத்த நடவடிக்கை எடுக்கப்பட்டுள்ளதாகக் காவல்துறையினர் தெரிவித்தனர்.
உயிரிழந்தவரின் சடலம் பிரேதப் பரிசோதனைக்காக டிக்கோயா ஆதார மருத்துவமனையின் நீதித்துறை மருத்துவப் பரிசோதகர் அலுவலகத்திற்கு அனுப்பி வைக்கப்பட்டுள்ளது. சம்பவம் தொடர்பாக நல்லதண்ணி காவல் துறையினர் மேலதிக விசாரணைகளைத் தீவிரமாக முன்னெடுத்து வருகின்றனர்.
