சம்பளக் குறைப்பு மற்றும் கொடுப்பனவுப் பிரச்சினைகளுக்கு வரவு செலவுத் திட்டத்தில் தீர்வு கோரி, அரச வைத்திய அதிகாரிகள் சங்கம் இன்று கொழும்பில் கவனயீர்ப்பு ஆர்ப்பாட்டம் ஒன்றை முன்னெடுக்கவுள்ளது.
கொழும்பு தேசிய வைத்தியசாலைக்கு முன்னால் இன்று நடைபெறவுள்ள இந்த ஆர்ப்பாட்டத்தில், நாடு முழுவதிலும் உள்ள ஆயிரக்கணக்கான வைத்தியர்கள் கலந்து கொள்ளவுள்ளதாகச் சங்கத்தின் உதவிச் செயலாளர் வைத்தியர் சமில் விஜேசிங்ஹ தெரிவித்துள்ளார்.
இருப்பினும், இந்த ஆர்ப்பாட்டத்தினால் வைத்தியசாலைகளின் தினசரி பணிகளுக்கோ அல்லது நோயாளர் பராமரிப்புச் சேவைகளுக்கோ எவ்விதத் தடங்கலும் ஏற்படாது என்றும், அனைத்து வைத்தியசாலைகளிலும் சேவைகள் வழக்கம் போல் தொடரும் என்றும் அவர் உறுதியளித்துள்ளார்.
எதிர்வரும் 12ஆம் திகதி பாராளுமன்றத்தில் சமர்ப்பிக்கப்படவுள்ள வரவு செலவுத் திட்டத்தில் தமக்கு உரியத் தீர்வு கிடைக்கும் என எதிர்பார்ப்பதாகவும், அரசாங்கத்திற்கான முதற்கட்ட எச்சரிக்கையாகவே இது நடத்தப்படுவதாகவும் அவர் குறிப்பிட்டுள்ளார்.
இதேவேளை, வரவு செலவுத் திட்டத்தில் கோரிக்கைகளை நிறைவேற்ற வலியுறுத்தி, இணைந்த சுகாதார ஊழியர் சங்கமும் இன்று நாடு தழுவிய ரீதியில் போராட்டங்களை முன்னெடுக்கவுள்ளதாக அறிவித்துள்ளது.
