வட்டவளை புகையிரத நிலையப் புனரமைப்புப் பணிகள் விரைவில் ஆரம்பம்: தற்காலிக கட்டிடமும் அமைப்பு
போக்குவரத்து அமைச்சு, இராணுவம் மற்றும் ‘Clean Sri Lanka’ செயலகத்தின் கூட்டுத் திட்டம்; இது மண்சரிவு அல்ல என தேசிய கட்டிட ஆராய்ச்சி நிறுவனம் (NBRI) விளக்கம்!
கடந்த 2026 ஆகஸ்ட் மாதம் ஏற்பட்ட அசம்பாவிதத்தினால் கடுமையாகச் சேதமடைந்த மலையகப் புகையிரதப் பாதையிலுள்ள வட்டவளை புகையிரத நிலையத்தை மீளமைக்கும் பணிகள் துரிதப்படுத்தப்பட்டுள்ளன.
இதன் தற்காலிக நடவடிக்கைகளுக்காக தற்போது வேறொரு கட்டிடம் அமைக்கப்பட்டு வருவதுடன், சேதமடைந்த புகையிரத நிலையத்தைப் புனரமைக்கும் பணிகளும் அதனுடன் தொடர்புடைய உள்கட்டமைப்பு வசதிகளை மேம்படுத்தும் பணிகளும் விரைவில் ஆரம்பிக்கப்படவுள்ளன.
இந்தத் திட்டமானது போக்குவரத்து அமைச்சு, ‘Clean Sri Lanka’ செயலகம், இலங்கை இராணுவம் மற்றும் இலங்கை புகையிரதத் திணைக்களம் ஆகியவை இணைந்து கூட்டுத் திட்டமாக முன்னெடுக்கவுள்ளன.
கடந்த 2026 ஆகஸ்ட் 03 மற்றும் 04 ஆம் திகதிகளில் ஏற்பட்ட இயற்கை அனர்த்த நிலைமை காரணமாக, மலையகப் புகையிரதப் பாதையில் அமைந்துள்ள பழமையான வட்டவளை புகையிரத நிலையத்திற்குப் பலத்த சேதம் ஏற்பட்டது. நிலையத்திற்குப் பின்புறமுள்ள சரிவுப் பகுதி நிலையற்றதாகி, அங்கிருந்த மண் பகுதி புகையிரத நிலையக் கட்டிடத்தின் மீது விழுந்தமையினாலேயே இந்த அனர்த்தம் ஏற்பட்டது குறிப்பிடத்தக்கது.
வட்டவளையில் பதிவான இச்சரிவு நிலையற்ற தன்மை அடைந்தமையானது சாதாரணமான ‘மண்சரிவு’ (Landslide) நிலைமை அல்ல என தேசிய கட்டிட ஆராய்ச்சி நிறுவனத்தின் (NBRI) நுவரெலியா மாவட்ட பிரதான புவியியலாளர் புத்திக விஜேகோன் தெரிவித்தார்.
வட்டவளை புகையிரத நிலையத்தைப் புனரமைப்பதற்காக அவ்வளாகத்தில் இன்று நடைபெற்ற கள ஆய்வில் கலந்துகொண்டபோதே அவர் ஊடகங்களுக்கு இந்த விளக்கத்தை அளித்தார்.
