அஸ்வெசும நலன்புரி உதவித் திட்டத்தின் முதலாவது புதுப்பிக்கப்பட்ட பயனாளிகள் பட்டியலின்படி, ஒன்பது இலட்சத்து 91 ஆயிரத்து 800 குடும்பங்கள் நலன்புரி உதவிகளைப் பெறுவதற்குத் தகுதி பெற்றுள்ளதாக நலன்புரி நன்மைகள் சபை தெரிவித்துள்ளது.
அதேநேரம், தகவல்களைப் புதுப்பித்த 23 இலட்சத்திற்கும் அதிகமான குடும்பங்களில், 13 இலட்சத்து 91 ஆயிரத்து 830 குடும்பங்கள் இம்முறை தகுதியிழந்துள்ளன.
தகுதி பெற்றுள்ள குடும்பங்களில் மிகவும் வறிய பிரிவைச் சேர்ந்த 3 இலட்சத்து 63 ஆயிரத்து 142 குடும்பங்களுக்கு மாதாந்தம் 17,500 ரூபாவும், வறிய பிரிவைச் சேர்ந்த 6 இலட்சத்து 28 ஆயிரத்து 658 குடும்பங்களுக்கு மாதாந்தம் 10,000 ரூபாவும் வழங்கப்படவுள்ளது.
புதிய பயனாளிகள் பட்டியல் பிரதேச செயலகங்கள், கிராம அலுவலர் அலுவலகங்கள் மற்றும் www.wbb.gov.lk என்ற இணையத்தளத்திலும் காட்சிப்படுத்தப்பட்டுள்ளதாக நலன்புரி நன்மைகள் சபை மேலும் தெரிவித்துள்ளது.
