தலவாக்கலை பிரதேச செயலகத்திற்கு அஸ்வெசும நிவாரணத் திட்டம் தொடர்பான ஆவணங்களைச் சரிபார்த்துக் கொள்வதற்காக, பெருமளவிலான மக்கள் வருகை தந்ததைத் தொடர்ந்து அங்கு இன்று (18) கடும் நெரிசல் ஏற்பட்டுள்ளது.
பிரதேச செயலக வளாகத்திலிருந்து பல கிலோமீற்றர் தூரம் வரை மக்கள் நீண்ட வரிசையில் காத்திருந்தனர். ஆவணங்களைச் சரிபார்த்தல், QR குறியீடுகளைப் பரிசோதித்தல் மற்றும் வங்கிக் கணக்கு இலக்கங்களைப் வழங்குதல் உள்ளிட்ட தேவைகளுக்காகவே இவர்கள் வருகை தந்திருந்தனர்.
தொலைதூரப் பிரதேசங்களில் இருந்து வருகை தந்த மக்கள் அதிகாலை 4.00 மணி முதலே வரிசைகளில் காத்திருந்ததாகவும், நோயாளிகள் மற்றும் வயோதிபர்கள் கூட நீண்ட நேரம் மிகுந்த சிரமங்களை எதிர்கொண்டதாகவும் தோட்டத் தொழிற்சங்கப் பிரதிநிதிகள் குற்றம் சாட்டியுள்ளனர்.
இது தொடர்பில் அதிகாரிகளிடம் வினவியபோது, தலவாக்கலை பிரதேச செயலகப் பிரிவில் 30 ஆயிரத்திற்கும் அதிகமான அஸ்வெசும பயனாளிகள் உள்ளதாகவும், அவர்களில் பெரும்பான்மையானோர் ஒரே நேரத்தில் வருகை தந்தமையே இந்த நெரிசற்குக் காரணம் என்றும் விளக்கமளித்துள்ளனர்.
