நுவரெலியா புனித சவேரியார் கல்லூரியின் பழமையான ஆரம்பப் பிரிவு கட்டிடத்தை அகற்றி புதிய கட்டிடம் அமைக்க கோரிக்கை
சுற்றுலாப் பயணிகளை அதிகளவில் கவரும் முக்கிய சுற்றுலா நகரமாக நுவரெலியா விளங்குகிறது. இந்நகரின் மையப்பகுதியில் நூற்றாண்டு கால வரலாற்றைக் கொண்ட புனித சவேரியார் கல்லூரி அமைந்துள்ளது.
நீண்டகால கல்விப் பாரம்பரியத்தைக் கொண்ட இப்பாடசாலை, பல கல்வியாளர்களையும், பல்வேறு துறைகளில் திறமைகளை வெளிப்படுத்திய மாணவர்களையும் உருவாக்கியுள்ளதுடன், விளையாட்டுத் துறையிலும் திறமையான வீரர்களை உருவாக்கிய பெருமையைப் பெற்றுள்ளது.
தமிழ் மற்றும் சிங்கள மொழிப் பிரிவுகளில் மாணவர்கள் கல்வி கற்கும் இப்பாடசாலை, நுவரெலியா நகரின் கல்வி வரலாற்றில் முக்கிய இடத்தைப் பெற்றுள்ள பாடசாலைகளில் ஒன்றாகக் காணப்படுகிறது.
எனினும், பாடசாலையின் ஆரம்பப் பிரிவிற்காக பயன்படுத்தப்பட்டு வந்த பழமையான கட்டிடம் தற்போது கடுமையாக சேதமடைந்த நிலையில், மாணவர்களின் பயன்பாட்டிற்கு பொருத்தமற்றதாக காணப்படுவதால் மூடப்பட்ட நிலையில் உள்ளது.
நீண்டகாலமாக பயன்படுத்தப்படாமல் காணப்படும் இந்தக் கட்டிடம், பாடசாலையின் வளாகத்திற்குள் ஒரு பயனற்ற பகுதியாக மட்டுமன்றி, பாடசாலை வளாகத்தின் அழகையும் பாதிக்கும் வகையில் காணப்படுவதாக பழைய மாணவர்கள் தெரிவிக்கின்றனர்.
குறிப்பாக, நுவரெலியா நகரின் முக்கியமான பகுதியில் அமைந்துள்ள இப்பாடசாலைக்கு அருகாமையில் வரலாற்றுச் சிறப்புமிக்க புனித பிரான்சிஸ் சவேரியார் தேவாலயமும் அமைந்துள்ளமை குறிப்பிடத்தக்கது. இதனால், பாடசாலையின் பழமையான கட்டிடத்தை முறையாக அகற்றி, அந்த இடத்தை நவீன கல்வி தேவைகளுக்கு ஏற்ற வகையில் பயன்படுத்த வேண்டிய அவசியம் ஏற்பட்டுள்ளதாக தெரிவிக்கப்படுகிறது.
இன்றைய கல்விச் சூழலில் மாணவர்களுக்கு பாதுகாப்பானதும், நவீன வசதிகளைக் கொண்டதுமான வகுப்பறைகள், அறிவியல் மற்றும் தொழில்நுட்பக் கல்விக்கான வசதிகள், நூலகம், செயற்பாட்டு அறைகள், விளையாட்டு மற்றும் இணைப்பாடவிதான நடவடிக்கைகளுக்கான இடவசதிகள் போன்றவை அவசியமாகின்றன.
எனவே, பழைய கட்டிடத்தின் நிலைமை தொடர்பில் உரிய தொழில்நுட்ப மதிப்பீட்டை மேற்கொண்டு, அதனை அகற்றி, அதே இடத்தில் புதிய, நவீன ஆரம்பப் பிரிவு கட்டிடமொன்றை நிர்மாணிப்பதற்கான நடவடிக்கைகளை அரசாங்கமும் கல்வி அதிகாரிகளும் முன்னெடுக்க வேண்டும் என பழைய மாணவர்கள் சங்கத்தினர் கோரிக்கை விடுக்கின்றனர்.
புதிய கட்டிடம் அமைக்கப்பட்டால், மாணவர்களுக்கு பாதுகாப்பானதும் சிறந்ததுமான கல்விச் சூழலை ஏற்படுத்துவதுடன், பாடசாலை வளாகத்தின் அழகையும் மேம்படுத்த முடியும். அதேவேளை, நுவரெலியா நகரின் முக்கிய பகுதியில் அமைந்துள்ள இந்த வரலாற்றுச் சிறப்புமிக்க பாடசாலையின் கல்வித் தரத்தையும் உட்கட்டமைப்பு வசதிகளையும் மேலும் மேம்படுத்துவதற்கான வாய்ப்பும் ஏற்படும்.
நூற்றாண்டு கால கல்விப் பாரம்பரியத்தை கொண்ட புனித சவேரியார் கல்லூரியின் எதிர்கால தலைமுறைகளுக்காக, பழைய கட்டிடத்தை நவீன கல்விக் கட்டிடமாக மாற்றுவதற்கு உரிய அதிகாரிகள் உடனடி கவனம் செலுத்த வேண்டும் என பழைய மாணவர்கள் சங்கத்தினர் பணிவுடன் கேட்டுக்கொண்டுள்ளனர்.
