பூஜ்ய கலகொடஅத்தே ஞானசார தேரருக்குத் தான் வழங்கிய ஜனாதிபதி பொதுமன்னிப்பு செல்லாது என உயர்நீதிமன்றம் தீர்ப்பளித்தமை தொடர்பில், மகா சங்கத்தினரிடம் முன்னாள் ஜனாதிபதி மைத்திரிபால சிறிசேன நிபந்தனையற்ற மன்னிப்புக் கோரியுள்ளார்.
இது குறித்து அவர் வெளியிட்டுள்ள விசேட அறிக்கையில், ஞானசார தேரர் மீண்டும் சிறை செல்வதற்குத் தனது முன்னாள் அதிகாரிகளின் நிர்வாகத் தவறே காரணம் எனக் குறிப்பிட்டுள்ளார்.
ஹோமாகம நீதவான் நீதிமன்றில் ஞானசார தேரருக்கு எதிராக நிலுவையில் இருந்த இரு வழக்குகள் தொடர்பில் பொதுமன்னிப்பு வழங்கும் போது, நீதி மற்றும் சிறைச்சாலைகள் அமைச்சின் ஒப்புதல் பெறப்பட்டிருக்க வேண்டும்.
எனினும், தன் கீழ் பணியாற்றிய அதிகாரிகள் அமைச்சின் அனுமதியைப் பெறாமல், நேரடியாகத் தன்னிடம் கையொப்பம் பெற்றுத் தன்னை தவறாக வழிநடத்தியுள்ளதாக அவர் தெரிவித்துள்ளார்.
நீதிமன்றத்தின் தீர்ப்பை முழுமையாக மதிப்பதாகத் தெரிவித்துள்ள முன்னாள் ஜனாதிபதி மைத்திரிபால சிறிசேன, தனது அதிகாரிகளால் இடம்பெற்ற இந்தத் தவறுக்காகவே மகா சங்கத்தினரிடம் மன்னிப்புக் கோருவதாகவும் குறிப்பிட்டுள்ளார்.
