அமெரிக்க ஜனாதிபதி ஜோ பைடன் சவூதி அரேபியாவுக்கு விஜயம் செய்யவுள்ளதாக வெள்ளை மாளிகை உறுதிப்படுத்தியுள்ளது. சவூதி அரேபியாவின் முடிக்குரிய இளவரசர் மொஹமட் பின் சல்மானை, பைடன் சந்தித்து கலந்துரையாடல்களில் ஈடுபடவுள்ளதாக வெள்ளை மாளிகை உறுதிப்படுத்தியுள்ளது. அமெரிக்க ஜனாதிபதியாக ஜோ பைடன் பதவியேற்றதன் பின்னர் முதன்முறையாக அடுத்த மாதம் மத்திய கிழக்கு நாடுகளுக்கான விஜயத்தை மேற்கொள்ளவுள்ளார். இஸ்ரேல், ஆக்கிரமிக்கப்பட்ட மேற்குக்கரை பகுதி மற்றும் சவூதி அரேபியா ஆகிய இடங்கள் அவரது பயணத்திட்டத்தில் காணப்படுகின்றன.
ஏற்கனவே அறிவிக்கப்பட்டதற்கமைய ஜுலை மாதம் 13ம் திகதிக்கும் 16ம் திகதிக்கும் இடைப்பட்ட காலப்பகுதியில் ஜோ பைடனின் மத்திய கிழக்கு விஜயம் திட்டமிடப்பட்டிருந்தது. எனினும் சவூதி அரேபியாவுடன் காணப்படும் முரண்பாடுகளையடுத்து அங்கு விஜயம் மேற்கொள்வதா, இல்லையா என்பது தொடர்பில் எவ்வித தீர்மானங்களும் உறுதியாக அறிவிக்கப்படாத நிலையில், தற்போது வெள்ளை மாளிகை அதனை உறுதிப்படுத்தியுள்ளது.
