பாகிஸ்தானுக்கு எதிரான முதலாவது டெஸ்ட் போட்டியின் முதல் இன்னிங்ஸில் இலங்கை 312 ஓட்டங்களை பெற்றுள்ளது.
இலங்கைக்கு சுற்றுப் பயணம் மேற்கொண்டுள்ள பாகிஸ்தான் கிரிக்கெட் அணியானது இலங்கையுடன் இரண்டு போட்டிகள் கொண்ட டெஸ்ட் தொடரில் விளையாடி வருகிறது.
காலி சர்வதேச கிரிக்கெட் மைதானத்தில் நேற்று ஆரம்பமான முதல் போட்டியில் நாணய சுழற்சியில் வெற்றி பெற்ற இலங்கை முதலில் துடுப்பெடுத்தாடுவதற்கு தீர்மானித்தது.
அதன்படி, முதலில் துடுப்பெடுத்தாடிய இலங்கை அணி போட்டியின் முதலாம் நாள் நிறைவில் 6 விக்கெட் இழப்புக்கு 242 ஓட்டங்களை பெற்றிருந்தது.
அஞ்சலோ மெத்தியூஸ் 64 ஓட்டங்களுடனும் தனஞ்சய டிசில்வா 96 ஓட்டங்களுடனும் ஆட்டமிழக்காதிருந்தனர்.
இந் நிலையில் போட்டியின் இரண்டாம் நாள் ஆட்டம் இன்று ஆரம்பிக்க தனஞ்சய டிசில்வா டெஸ்ட் அரங்கில் தனது 10 ஆவது சதத்தை பூர்த்தி செய்தார்.
இறுதியாக இலங்கை அணி 95.2 ஓவர்களில் அனைத்து விக்கெட்டுகளையும் இழந்து 312 ஓட்டங்களை பெற்றது.
இலங்கை சார்பில் அதிகபடியாக தனஞ்சய டிசில்வா 122 ஓட்டங்களையும், அஞ்சலோ மொத்தியூஸ் 64 ஓட்டங்களையும் பெற்றனர்.
பந்து வீச்சில் பாகிஸ்தான் சார்பில் ஷஹீன் அப்ரிடி, நஷீம் ஷா மற்றும் அப்ரார் அகமட் ஆகியோர் தலா 3 விக்கெட்டுகளையும், ஆகா சல்மான் ஒரு விக்கெட்டினையும் கைப்பற்றினர்.
தற்சமயம் பாகிஸ்தான் அணி தனது முதல் இன்னிங்ஸுக்காக துடுப்பெடுத்தாடி வருகிறது.
